Да Калосян Пасланне святога Апостала Паўла

Раздзел 1

¹Павел, воляю Божаю Апостал Іісуса Хрыста, і Цімафей брат,

²тым, што ў Калосах, святым і верным братам у Хрысце Іісусе:

³благадаць вам і мір ад Бога, Айца нашага, і Госпада Іісуса Хрыста. Дзякуем Богу і Айцу Госпада нашага Іісуса Хрыста, заўсёды молячыся за вас,

⁴дачуўшыся пра веру вашу ў Хрыста Іісуса і пра любоў, якую вы маеце да ўсіх святых,

⁵у надзеі на ўгатава́нае вам на нябёсах, пра што вы раней чулі ў слове ісціны, у дабравесці,

⁶якое прыйшло да вас; як і ва ўсім свеце яно і пладаносіць, і ўзрастае, так і сярод вас ад таго дня, як вы пачулі і спазналі благадаць Божую ў ісціне,

⁷як і навучыліся ад Эпафраса, узлюбленага суработніка нашага, вернага дзеля вас служыцеля Хрыстовага,

⁸які і паведаміў нам пра вашу любоў у духу.

⁹Таму і мы з таго дня, як гэта пачулі, не перастаём маліцца за вас і прасіць, каб вы напаўняліся спазнаннем волі Яго ва ўсякай мудрасці і разуменні духоўным,

¹⁰каб жылі дастойна Госпада, ва ўсім дагаджаючы Яму, прыносячы плод ва ўсякай справе добрай і ўзрастаючы ў спазнанні Бога,

¹¹умацоўваючыся ўсякаю сілаю паводле магутнасці славы Яго, на трываласць ва ўсім і доўгацярплівасць з радасцю,

¹²узносячы падзяку Богу і Айцу, Які паклікаў нас да ўдзелу ў спадчыне святых у святле,

¹³Які вызваліў нас з-пад улады цемры і ўвёў у Царства ўзлюбленага Сына Свайго,

¹⁴у Якім мы маем выкупле́нне Крывёю Яго і прабачэнне грахоў,

¹⁵Які ёсць вобраз Бога нябачнага, першанароджаны раней за ўсякае стварэнне;

¹⁶бо Ім створана ўсё, што на нябёсах і што на зямлі, бачнае і нябачнае: ці то прастолы, ці дзяржавы, ці начальствы, ці ўлады, — усё праз Яго і для Яго створана;

¹⁷і Ён існуе раней за ўсё, і ўсё ў Ім знаходзіцца.

¹⁸І Ён — галава цела Царквы; Ён — пачатак, першынец з мёртвых, каб ва ўсім Ён меў пе́ршынства:

¹⁹бо ўгодна было Айцу, каб у Ім заключалася ўся паўната,

²⁰і каб праз Яго прымірыць з Сабою, устанавіўшы мір праз Яго, Крывёю крыжа Яго, усё — і зямное, і нябеснае.

²¹І вас, якія калісьці былі чужымі і варожымі Богу ў думках і ліхіх справах,

²²цяпер Ён прымірыў у целе Плоці Яго, смерцю Яго, каб паставіць вас святымі, і беззаганнымі, і бездакорнымі перад Сабою,

²³калі толькі вы застаяце́ся цвёрдымі і непахіснымі ў веры і не адпада́еце ад надзеі дабравесця, якое вы чулі, якое абвешчана ўсяму стварэнню паднябеснаму і якому я, Павел, стаў служыцелем.

²⁴Цяпер я радуюся ў пакутах маіх за вас і дапаўняю нястачу ў плоці маёй мук Хрыстовых за Цела Яго, якім з’яўляецца Царква,

²⁵служыцелем якой я стаў паводле даручэння Божага, дадзенага мне дзеля вас, каб у паўнаце абве́сціць слова Божае,

²⁶тайну, схаваную ад вякоў і ад родаў, а цяпер адкрытую святым Яго,

²⁷якім пажадаў Бог паказаць, у чым багацце славы для язычнікаў тайны гэтай, якая ёсць Хрыстос у вас — надзея славы,

²⁸Якога мы прапаведуем, настаўляючы кожнага чалавека і навучаючы кожнага чалавека ўсёй мудрасці, каб паказаць кожнага чалавека дасканалым у Хрысце Іісусе,

²⁹дзеля чаго я і працую, змагаючыся сілаю Яго, якая дзейнічае ўва мне магутна.

Раздзел 2

¹Я хачу, каб вы ведалі, якую вялікую барацьбу я вяду за вас і за тых, што ў Лаадыкі́і і ў Іера́палі, і за ўсіх, хто не бачыў аблічча майго ў плоці,

²каб усце́шыліся сэрцы іх, злучаныя ў любові і дзеля ўсяго багацця паўнаты разумення, дзеля спазна́ння тайны Бога і Айца і Хрыста,

³у Якім скрыты ўсе скарбы мудрасці і ве́дання.

⁴Гэта кажу я, каб хто-небудзь не ўвёў вас у зман праўдападобнымі довадамі;

⁵бо я, хоць і адсутнічаю плоццю, але духам з вамі, радуючыся і бачачы ў вас лад і цвёрдасць вашай веры ў Хрыста.

⁶Дык вось, як прынялі́ вы Хрыста Іісуса Госпада, так і хадзіце ў Ім,

⁷укаранёныя і ўсталява́ныя ў Ім і ўмацава́ныя ў веры, як вы былі наву́чаны, узбагача́ючыся ў ёй з удзячнасцю.

⁸Глядзіце, каб хто-небудзь не захапіў вас філасофіяй і пустым падманам паводле пада́ння чалавечага, паводле стыхій свету, а не паводле Хрыста,

⁹бо ў Ім прысутнічае ўся паўната Бажаства цялесна,

¹⁰і вы маеце паўнату ў Ім, Які з’яўляецца галавою ўсякага начальства і ўлады;

¹¹у Ім вы і абрэзаны былі́ абрэзаннем нерукатворным, скіда́ннем грахоўнага цела плоці, абрэзаннем Хрыстовым;

¹²пахаваныя разам з Ім у хрышчэнні, у Ім вы разам і ўваскрэслі праз веру ў сілу Бога, Які ўваскрасіў Яго з мёртвых,

¹³і вас, якія былі мёртвымі ў грахах і ў неабрэзанні плоці вашай, ажывіў разам з Ім, прабачыўшы нам усе грахі,

¹⁴сцёршы прад’яўлены нам спісак даўгоў, што быў супраць нас; Ён скасаваў яго, прыбіўшы цвікамі да крыжа;

¹⁵абяззброіўшы начальствы і ўлады^*, Ён выставіў іх на ганьбу, перамогшы іх Сабою.

¹⁶Дык вось, няхай ніхто не асуджа́е вас за ежу, ці за пітво, ці за тое, што даты́чыць свята, ці маладзіка́, ці суботы:

¹⁷гэта — цень бу́дучыні, це́ла ж — Хрыстос.

¹⁸Ніхто няхай не ўвядзе вас у зман праз самавольную пакорнаму́драсць і паклане́нне ангелам, удаючы́ся ў тое, чаго не бачыў, марна надзіма́ючыся плоцкім сваім розумам

¹⁹і не трыма́ючыся галавы, ад якой ўсё цела, сувязямі і злучэннямі змацава́нае і з’ядна́нае, расце ўзраста́ннем Божым.

²⁰Дык вось, калі вы з Хрыстом памерлі для стыхій свету, то чаму вы, як быццам жывучы́ ў свеце, падпарадкоўваецеся ўстанаўленням:

²¹“не дакранайся”, “не еж”, “не чапа́й” —

²²усё гэта знішчаецца пры ўжыванні — паводле запаведзяў і вучэння чалавечага́

²³гэта мае толькі выгляд мудрасці ў самавольным пакланенні, пакорнамудрасці і знясільва́нні цела, у пэўным занядба́нні насычэ́ння плоці.

Раздзел 3

¹Дык вось, калі вы ўваскрэслі з Хрыстом, то шукайце вы́шняга, дзе Хрыстос сядзіць праваруч Бога;

²пра вы́шняе думайце, а не пра зямное.

³Бо вы памерлі, і жыццё ваша схавана з Хрыстом у Богу;

⁴калі я́віцца Хрыстос, жыццё ваша, тады і вы будзеце я́ўлены з Ім у славе.

⁵Дык умярцвіце зямныя члены вашы: блуд, нечыстату, страсць, ліхую пажадлівасць і хцівасць, якая з’яўля́ецца ідаласлужэ́ннем, —

⁶за гэта прыходзіць гнеў Божы на сыноў праціўле́ння;

⁷гэта і вы не́калі рабілі, калі жылі́ сярод іх.

⁸Цяпер жа вы адкі́ньце ўсё: гнеў, ярасць, злосць, блюзнерства, брыдкаслоўе вуснаў вашых;

⁹не лжы́це адно аднаму, бо вы знялі́ з сябе старога чалавека з учы́нкамі яго

¹⁰і апрану́ліся ў новага, які абнаўляецца дзеля пазнання паводле вобраза Стваральніка яго,

¹¹дзе няма ні Эліна, ні Іудзея, ні абрэ́зання, ні неабрэ́зання, ні ва́рвара, ні Скіфа, ні раба, ні свабоднага, а ўсё і ва ўсім — Хрыстос.

¹²Дык апрані́цеся як абра́ннікі Божыя, святы́я і ўзлю́бленыя, у сардэчную спага́длівасць, добрасць, пакорнаму́драсць, лагоднасць, доўгацярплі́васць,

¹³ста́вячыся цярпліва адно да аднаго і прабача́ючы ўзаемна, калі хто на каго ма́е кры́ўду: як Хрыстос праба́чыў вам, так і вы.

¹⁴А па-над усім гэтым апраніцеся ў любоў, якая з’яўляецца суку́пнасцю даскана́ласці;

¹⁵і няхай валада́рыць у сэ́рцах вашых мір Божы, да якога вы і пакліканы ў адным целе; і будзьце ўдзячнымі.

¹⁶Слова Хрыстова няхай жыве ў вас ва ўсім яго багацці, з усякаю мудрасцю; навучайце і настаўляйце на розум адно аднаго псалмамі, і гімнамі, і песнямі духоўнымі, з удзячнасцю спяваючы ў сэрцах вашых Госпаду.

¹⁷І ўсё, што б вы ні рабілі словам ці ўчынкам, усё рабіце ў імя Госпада Іісуса Хрыста, дзя́куючы Богу і Айцу праз Яго.

¹⁸Жонкі, падпарадко́ўвайцеся сваім мужам, як нале́жыць у Госпадзе.

¹⁹Мужы́, любі́це жонак вашых і не будзьце жорсткімі да іх.

²⁰Дзеці, слухайцеся бацькоў ва ўсім, бо гэта ўгодна Госпаду.

²¹Бацькі, не раздражня́йце дзяцей вашых, каб яны не па́далі духам.

²²Рабы, ва ўсім слу́хайцеся гаспадароў вашых па плоці, не напаказ слу́жачы, як чалавекаўго́днікі, а ў шчы́расці сэ́рца, баючы́ся Бога.

²³І ўсё, што б ні рабілі вы, рабіце ад душы́, як для Госпада, а не як для людзей,

²⁴ведаючы, што ад Госпада ва ўзнагароду атрыма́еце спадчыну, бо вы слу́жыце Госпаду Хрысту.

²⁵А хто няпра́веднае чы́ніць, той атрыма́е паводле сваёй няпра́веднасці, без зважа́ння на асобу.

Раздзел 4

¹Гаспадары́, абыхо́дзьцеся з рабамі па праўдзе і справядлівасці, ведаючы, што і вы маеце Госпада на нябёсах.

²Будзьце пастаяннымі ў малітве, трыва́ючы ў ёй з удзячнасцю;

³маліцеся таксама і за нас, каб Бог адчыніў нам дзверы для слова — абвяшча́ць тайну Хрыстову, за якую я і зняво́лены,

⁴каб я вы́казаў яе ясна, як нале́жыць мне абвяшчаць.

⁵Са зне́шнімі абыхо́дзьцеся мудра, суадно́сячыся з ча́сам.

⁶Слова ваша няхай будзе заўсёды з благадаццю, прыпра́ўленае соллю, каб вы ведалі, як трэба адказваць кожнаму.

⁷Пра мяне ўсё раскажа вам Ціхік, узлюблены брат і верны служыцель і супрацоўнік у Госпадзе;

⁸яго я паслаў да вас для таго, уласна, каб ён даведаўся пра вашы справы і суце́шыў сэрцы вашы,

⁹разам з Анісімам, верным і ўзлю́бленым бра́там, які ад вас: яны раскажуць вам пра ўсё што тут робіцца.

¹⁰Вітае вас Арыстарх, зняво́лены разам са мною, і Марк, родзіч Варнавы, — наконт якога вы атрыма́лі наказы: калі прыйдзе да вас, прымі́це яго, —

¹¹таксама Іісус, называ́ны Іустам, якія паходзяць з абрэ́заных; гэта адзіныя супрацоўнікі для Царства Божага, якія былі́ мне суцяшэ́ннем.

¹²Вітае вас Эпафрас, які з вашых, раб Іісуса Хрыста, які заўсёды падзвіза́ецца ў малітвах за вас, каб вы былі дасканалыя і напоўненыя ўсім, што даспадобы Богу.

¹³Све́дчу пра яго, што ён праяўляе вялікую руплі́васць за вас і за тых, хто ў Лаадыкіі і ў Іерапалі.

¹⁴Вітае вас Лука, лекар узлю́блены, і Дзімас.

¹⁵Вітайце братоў у Лаадыкіі, і Німфана, і дамашнюю царкву яго.

¹⁶І калі гэтае пасланне будзе прачы́тана ў вас, зрабіце так, каб яно было прачы́тана і ў Лаадыкійскай царкве; а тое, што з Лаадыкіі, каб і вы прачыталі.

¹⁷І скажыце Архіпу: будзь уважлівы да служэння, якое ты прыня́ў у Госпадзе, каб табе вы́канаць яго.

¹⁸Прывітанне маёю рукою, Паўлаваю. Памятайце пра мае аковы. Благадаць з усімі вамі. Амінь.